Büdcə avtomobili təhlükəsizlik testindən uğurla keçə bilmədi

Просмотров: 1262
Büdcə avtomobili təhlükəsizlik testindən uğurla keçə bilmədi
  • Büdcə avtomobili təhlükəsizlik testindən uğurla keçə bilmədi
  • Büdcə avtomobili təhlükəsizlik testindən uğurla keçə bilmədi
  • Büdcə avtomobili təhlükəsizlik testindən uğurla keçə bilmədi
  • Büdcə avtomobili təhlükəsizlik testindən uğurla keçə bilmədi
  • Büdcə avtomobili təhlükəsizlik testindən uğurla keçə bilmədi

Avtomobillərin təhlükəsizliyi üzrə komitə (NCAP) 15 yeni avtomobil modelinin kraş-testlərinin nəticələrini açıqladı. Müsabiqədə iştirak edən avtomobillərin çoxu yüksək nəticələr göstərib.

Keçirdiyi testlərdə NCAP yaşlı (yetkinlik yaşına çatmış) sərnişinlərin, uşaqların, piyadaların (toqquşma hallarında) müdafiə olunma səviyyəsini, habelə avtomobilin aktiv təhlükəsizlik və ekstremal vəziyyətlərdə sürücüyə yardım sistemləri ilə təchiz olunma dərəcəsini yoxlayır. Komitənin apardığı qiymətləndirmə bir sıra amillərin məcmusuna əsaslanır.

Bu dəfə təhlükəsizlik testindən keçirilən avtomobillər bunlar idi: Dacia Lodgy Fiat 500L kompakt-venləri, Ford Kuga, Hyundai Santa Fe, Mitsubishi Outlander, Opel MokkaSubaru Forester krossoverləri, Range Rover ofrouderi, Ford Fiesta, Mercedes-Benz A-Class, SEAT Leon Toledo, Skoda Rapid, Volkswagen Golf kompakt hetçbekləri və hibrid güc qurğusu ilə təchiz olunmuş Volvo V60 Plug-in Hybrid universalı.

Bir avtomobildən savayı, qalanları maksimal təhlükəsizlik reytinqi (Euro NCAP təsnifatı üzrə 5 ulduz) qazandılar. Sınaqdan uğursuz çıxmış avtomobil isə Rumıniya istehsalı olan büdcə kompakt-veni Dacia Lodgy oldu.

Müsabiqənin ən bahalı iştirakçıları – yeni Range Rover və hibrid güc qurğusu ilə təchiz olunmuş Volvo V60 Plug-in Hybrid universalı yüksək nəticələr nümayiş etdirdilər. Qeyd edək ki, Volvo hibridinin təhlükəsizlik səviyyəsi ənənəvi daxiliyanma mühərriki ilə təchiz olunmuş V60 versiyasının təhlükəsizlik səviyyəsi ilə demək olar ki, bərabərləşib, baxmayaraq ki, hibridin litium batareyalarının kütləsi hibridin çəkisini bir qədər artırıb (350 kq). Testdə yaxşı nəticələr nümayiş etdirmiş Range Rover-in çəkisi isə, əksinə, 200 kq azalıb. Bir müddət sonra istehsalçı şirkət bu Britaniya ofrouderini yeni konstruksiyalı baş altlığı ilə təchiz etməyi planlaşdırır ki, bu da təhlükəsizlik səviyyəsini daha da artırmış olacaq.

Kompakt hetçbeklər seqmentində sürücüyə yardım edən bir neçə yeni təhlükəsizlik texnologiyası testdən keçirildi.
Məsələn, sonuncu nəsil Volkswagen Golf modeli Multi Collision Assist sistemi (bir neçə toqquşma təhlükəsi aşkar edildikdə ekstremal əyləcləmə sistemi), Front Assist kompleksi (bu kompleks qarşıdan gələn avtomobillə toqquşma təhlükəsinin olduğu barədə xəbərdarlıq edir) və Proactive Occupant Protection sistemi (bu sistem sərnişinləri mümkün toqquşmaya hazırlayır – kəmərləri tarımlayır, pəncərələri və lyuku bağlayır) ilə təchiz olunub. Qeyd edək ki, ən yeni sistemlərlə təchiz olunmasına baxmayaraq, yeddinci nəsil Golf avtomobilində arxa sərnişinlər üçün təhlükəsizlik kəmərlərinin sensoru yoxdur.

Mercedes-Benz A-ClassFord Fiesta modellərində də təhlükəsizliklə bağlı yeniliklər var. Yeni Mercedes hetçbeki Collision Prevention Assist sistemi (toqquşmanın qarşısını almaq üçün əyləcləmə sistemi) və Attention Assist sistemi (bu sistem sürücünün vəziyyətinə, onun diqqətinin idarəetmədən yayınmamasına nəzarət edir) ilə təchiz olunub. Bu sistemlər alıcılara standart avadanlıq qismində təklif olunur. Bunlardan əlavə, alıcılara opsiya qismində PRE SAFE sistemi (sərnişinin mümkün toqquşmaya hazırlanması) təklif olunur.

Ford Fiesta-ya gəlincə, bu avtomobil MyKey sistemi ilə təchiz olunur. Bu proqramlaşdırma sisteminin köməyi ilə sürücü avtomobilin əsas xarakteristikalarını öz istəyi əsasında tənzimləyə bilər. Məsələn, MyKey sisteminin köməyi ilə avtomobilin sahibi onun sürət həddini məhdudlaşdıra, yaxud kəmərlərin taxılmadığı barədə xəbərdarlığın daha israrlı şəkildə təkrarlanması rejimini təyin edə bilər. Avtomobildən uşaqlar və ya təcrübəsi az olan sürücülər istifadə edirsə, bu tədbirlər xüsusilə faydalı ola bilər.

Euro NCAP-ın qiymətləndirici fəaliyyəti dolayısı ilə avtomobil istehsalçılarını yeni təhlükəsizlik sistemləri tətbiq etməyə sövq edir. Məsələn, 2014-cü ildə standart avadanlıq qismində avtomatik ekstremal əyləcləmə sistemi ilə təchiz olunmayan avtomobillərə NCAP beş ulduz verməyəcək.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.  

Şərhlərin sayı: 0

AVATAR
Hələ heç kim şərh verməyib. Birinci siz olun.