BMW Active Tourer Concept

Просмотров: 2679
BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept
  • BMW Active Tourer Concept

BMW 5-Series GT avtomobilinin buraxılışı BMW tərəfindən atılan gözlənilməz və müəyyən dərəcədə inqilabi addım oldu. E-class modellərinin özünəməxsus ənənələri çoxdan bəri bərqərar olub. Bu sözlər xüsusən premium seqmentinə aiddir. Adətən sanballı avtomobillər ya əksər hallarda sedan, ya da bəzi hallarda universal kuzovu ilə buraxılır. Amma bu sözləri hetçbek versiyası barədə demək olmaz.

"Biznes-klass hetçbeki" ifadəsi mənasız görünür və yöndəmsiz səslənir. Belə avtomobillərin buraxılışını yalnız fransızlar özlərinə rəva bilmişdilər və nəticədə Renault Vel SatisCitroen C6 işıq üzü görmüşdü. Fransız istehsalçıların rəyinə görə, premium seqmentində almanları üstələmək çətin ki, onlara nəsib olsun. Buna görə də onlar bu seqmentdə bazara nəsə qeyri-adi, fransızsayağı qəribəliyi ilə seçilən bir şey çıxarmağı qərara almışdılar. Amma avtomobil ictimaiyyəti fransızların bu "orijinal" ideyasını gözlənilən coşqu ilə qarşılamadı və nəticədə bu qeyri-adi modellərin satışları uğursuz oldu. Tezliklə bu seqmentdə BMW 5-Series GT hetçbeki işıq üzü gördü. İndi isə almanlar yaxın gələcəkdə BMW 1-Series GT modelinə çevriləcək yeni konsepti təqdim edirlər.

Bu konseptual modelin adı BMW Active Tourer-dir. Konseptin ölçüləri 1-ci seriyalı BMW avtomobilinin ölçülərinə, proporsiyaları isə 1-ci seriyanın modellərinə uyğundur. 2009-cu ildə 5-Series Gran Turismo avtomobilinin buraxılışını bəziləri utopiya, digərləri cəsarətli addım, üçüncülər isə inqilab adlandırırdılar. Bütün bunların səbəbi ənənəvi sinfin avtomobilinin qeyri-ənənəvi kuzov versiyası ilə buraxılması idi.

Amma əsl inqilabı BMW məhz indi gerçəkləşdirdi. BMW brendinin mövcud olduğu bütün illər ərzində biz bu kompaniyanı arxa ötürücülü avtomobillərin istehsalçısı kimi, son bir neçə ildə isə həm də tam ötürücülü modellərin (X-Drive sistemi ilə) istehsalçısı kimi tanıyırdıq. Bütün bu dövrdə konsern arxa ötürücülü avtomobillərin istehsalına sadiqliyini bəyan edirdi və yalnız nadir hallarda, qeyri-rəsmi söhbətlərdə konsern təmsilçiləri ön ötürücülü BMW versiyasının işıq üzü görməsi ehtimalından danışırdılar. BMW Active Tourer-in prototipi məhz arxa ötürücülüdür, yəni onun aparıcı təkərləri arxa təkərlərdir. Hələlik yeni hetçbek konsept formasında nümayiş etdirilib, lakin almanlar artıq bu ilin yazında hetçbekin seriyalı istehsalına başlayacaqlarını vəd edirlər.

Dəbə uyğun olaraq, prototipin güc qurğusu hibrid formasındadır, yəni ona həm daxiliyanma mühərriki, həm də elektromotor quraşdırılıb. Yeni üç silindrli daxiliyanma mühərrikinin həcmi 1,5 litrdir. Bu aqreqatla konseptin ümumi qüvvəsi 190 at gücü təşkil edir. Amma seriya ilə buraxılacaq versiyalarda, şübhəsiz ki, benzinlə və ağır yanacaqla işləyən daxiliyanma mühərriklərinin çeşidi daha geniş olacaq. Avtomobilin hibrid versiyasının nümayişi sadəcə olaraq Paris-2012 avtosalonunda istehsalçının imicinin qorunması üçün zamanın tələbinə uyğun olaraq atılmış addımdır. Ola bilər ki, hibrid versiyası seriyalı istehsala buraxılsın, amma alıcılar belə avtomobilləri, demək olar ki, almırlar.

Maraqlıdır ki, BMW konserni konseptin sürət xarakteristikaları barəsində məlumat verib. Belə ki, 1-Series GT avtomobili 100 km/saat sürət yığmağa səkkiz saniyə sərf edir, onun maksimal sürəti isə saatda 200 km səviyyəsindədir. Amma bu rəqəmlərin həqiqətə nə dərəcədə uyğun olduğunu təcrübədə sınaqdan keçirmək hələlik mümkün deyil. Axı avtomobil sadəcə Paris-2012 avtosalonunun sərgisində eksponat kimi nümayiş etdirilib.


© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.