BMW 5-ci seriya (1995-2003)

Просмотров: 4404
BMW 5-ci seriya (1995-2003)

İkinci istismar bazarında satılan BMW 5-ci seriya avtomobilləri sedan kuzovludur. Yalnız 1997-ci ildən başlayaraq buraxılan universal kuzovlu modellərə isə bəzən rast gəlmək mümkün olsa da bu çox nadir hallarda baş verir. Heyf ki, belədir, axı 5-ci seriyanın bazasında hazırlanmış universal çox harmonik və hətta yaraşıqlı, dəbə uyğun görünür. Doğrudur, universalın mənfi cəhətlərindən biri ondan ibarətdir ki, o, bir qayda olaraq analoji komplektasiyaya malik və eyni texniki vəziyyətdə olan sedandan bahadır. Özü də qiymətdəki fərq bir neçə min dollar təşkil edə bilər. Məsələ heç də onda deyil ki, universalların istehsalına daha çox material sərf olunur. Türinq olunmuş bir çox universallar yükün ağırlığından asılı olaraq kuzovu avtomatik tarazlaşdıra bilən pnevmatik arxa asqıya malikdirlər.

Onu da qeyd etmək lazımdır ki, E39 kuzovlu BMW 5-ci seriya avtomobilləri təkcə Avropada deyil, həm də Rusiyada yığılmışdır, belə ki, 1999-cu ildən BMW 5 seriyalı modelləri Kalininqradda istehsal etməyə başlamışlar.

1988 - 1995-ci illərdə buraxılmış E34 kuzovlu BMW 5-ci seriya avtomobillərlə müqayisədə E39 kuzovlu avtomobillərin salonunda yer daha genişdir. Doğrudur, BMW 5 seriya E34 avtomobillərinə minənlərdən heç kim darısqallıqdan şikayətlənməyib, amma baş üzərində əlavə 7 millimetrlik və çiyin tərəflərdə əlavə 62 millimetrlik yerin olması heç də pis deyil.

E39 kuzovlu BMW 5-ci seriya avtomobillərdə çoxlu sayda hər cür elektron qurğular vardır. Təəccüblü burasıdır ki, həmin qurğular hətta 90-cı illərin ortalarında istehsal olunmuş modellərdə də problemsiz işləyir. İndiyədək avtomobili işə salan elektron sistemdən və ya daim sönən faralardan şikayətlənərək avtoservislərə müraciət edən avtomobil sahiblərinin sayı çox azdır. Əgər şüşələr və ya güzgülər daha sürücünün “sözünə qulaq asmırsa”, bu, çox güman ki, elektronikanın qüsuru deyil, kontaktlardakı oksidləşmənin nəticəsidir. Amma istismar olunduğu vaxtdan böyük məsafə qət etmiş avtomobillərdə qabaq şüşənin təmizləyicilərinin trapesiyası oksidləşməyə məruz qala və ya ventilyator pis işləyə bilər. Sonuncu problemin səbəbi çox vaxt müqavimət bloku deyilən hissədə və ya ventilyatorun özündə olur. Kondisionerin pis işləməsinin səbəbkarı isə bir sıra hallarda mərkəzi konsoldakı idarəetmə paneli olur. Biz belə sözlər eşidirik ki, BMW E39 avtomobilinə firmanın öz avtoservislərindən kənar yerlərdə siqnalizasiya quraşdırdıqda problemlər yaranır. Lakin təcrübəli ustalar iddia edirlər ki, bu avtomobilə siqnalizasiya sistemini problemsiz quraşdırmaq mümkündür.

Bircə dənə də olsun “aciz” mühərrik tapmaq mümkün deyil

Mühərriklər təkcə BMW-nin güclü cəhəti sayılmır. Onlar həm də bütün Bavariya avtomobillərinin başlıca üstünlüklərindən biridir. E39 kuzovlu BMW 5-ci seriya avtomobillərinə ümumilikdə 14 müxtəlif modifikasiyalı güc aqreqatı quraşdırılmışdır. Bu qədər modifikasiya hətta təcrübəli mütəxəssis sayılan şəxsləri də çaş-baş sala bilər. Öncə 6 silindrli benzin mühərriklərindən başlayaq. 2000-ci ilədək BMW 5-ci seriya modelləri 150 at gücünə malik 2,0 litr tutumlu (BMW 520i), 170 at gücünə malik 2,3 litr tutumlu (BMW 523i) və 193 at gücünə malik 2,8 litr tutumlu (BMW 528i) mühərriklərlə təchiz olunmuşdur. Çox vaxt bu sözləri eşitmək olar ki, 2,0 litr tutumlu güc aqreqatı 5-ci seriyanın avtomobillərinə o qədər də uyğun gəlmir. Lakin bu, nisbi mülahizədir, çünki mexaniki transmissiyalı belə avtomobillər 220 km/saat sürətlə hərəkət etməyə qadirdirlər. Razılaşın ki, bu heç də kiçik sürət deyil. 523i və 528i versiyalarını isə “əldən düşmüş” avtomobillər adlandırmağa, çətin ki, kiminsə dili gələr. Bunlar, yəqin ki, ən ideal BMW 5-ci seriya versiyalarıdır, belə ki, onlara quraşdırılmış 2,3 və 2,8 litr tutumlu mühərriklər həm güclü, həm də etibarlıdır, özü də bu avtomobillərin qiymətləri daha güclü V8 mühərriki quraşdırılmış avtomobillərə nisbətən ucuzdur. Modernləşdirmə aparıldıqdan sonra isə hətta 6 silindrli mühərriklər arasında da bircə dənə olsun “aciz”, yəni kifayət qədər gücə malik olmayan aqreqat tapmaq mümkün deyil. Məsələn, 520i versiyası 170 at gücünə malik 2,0 litr tutumlu mühərriklə təchiz olunmuşdur. Bundan başqa, müvafiq surətdə 192 və 231 at gücünə malik olan 2,5 və 3,0 litr tutumlu 6 silindrli güc aqreqatları quraşdırılmış BMW 525i və 530i seriyaları peyda olmuşdur.

Adi avtomobilə deyil, “əsil raketə” malik olmaq istəyənlər isə axtardıqlarını 8 silindrli mühərrikləri olan BMW 5-ci seriya modelləri arasında tapa bilərlər. 2 cür belə model buraxılmışdır, bunlar müvafiq surətdə 245 və 286 at gücünə malik olan 3,5 və 4,4 litr tutumlu mühərriklərlə təchiz olunmuşdur. 4,9 litr tutumlu unikal güc aqreqatı quraşdırılmış 400 at gücünə malik heyrətamiz aqreqatı da buraya əlavə etmək olardı, amma istehsalçılar həmin mühərriki BMW M5 versiyasına quraşdırmağı qərara almışlar, bu seriya adi 5-ci seriyadan ciddi surətdə fərqlənir və “ikinci əl bazarda satılan avtomobillər” rubrikasında ona ayrıca məqalə həsr etməyə dəyər.

Dizel mühərriki quraşdırılmış modelləri də unutmaq olmaz. İkinci əl bazarda onların sayı çox deyil, lakin belə aqreqatlar hər cür hörmətə layiqdir. 5-ci seriyanın avtomobillərinə quraşdırılmış mühərriklər arasında dizel yanacağı ilə işləyən aşağıdakı aqreqatlara rast gəlmək olar: 2,0 litr tutumlu (136 at gücünə malik), 2,5 litr tutumlu (143 və 163 at gücünə malik) və 2,9 litr tutumlu (184 və 193 at gücünə malik). Dizel mühərriki ilə təchiz olunmuş, xüsusən də daha güclü aqreqat quraşdırılmış BMW modelləri hər cəhətdən yaxşı avtomobillərdir. Yeganə istisna ondan ibarətdir ki, əksər hallarda bu avtomobillərin qət etdiyi məsafə həddən artıq böyük olur, yəni bu avtomobillərin sahibləri onları həddən artıq istismar etmiş olurlar. Bunun səbəbi odur ki, Avropada bu avtomobilləri adətən avtomaşınla səfərlər etməyə böyük ehtiyacı olan adamlar almışlar və hər il bu avtomobillər təxminən 50 min kilometr və daha artıq məsafə qət edirlər.

Nəticədə 5-7 illik istismardan sonra bu avtomobillərin qət etdiyi məsafə 250-400 min kilometr təşkil edir. Alman mühərrikləri nə qədər yaxşı olursa-olsun, ikinci əl bazarda avtomobil satın alınarkən artıq həmin aqreqatlar həddən artıq işlənmiş olur. Dizel mühərriklərinin təmiri isə çox baha başa gəlir (yaxşı vəziyyətdə olan işlənmiş mühərrik tapmaq real deyil). Ümumiyyətlə, dizel mühərrikləri köhnəlmiş olan BMW avtomobillərini almaqdan vaz keçsəniz daha yaxşı olar.

Təhlükəli variantlar

Təhlükəli modellər 5-ci seriyaya mənsub olan benzin mühərrikli avtomobillərin arasında da var. Bəzən satışda 1998-ci ilin sentyabrınadək istehsal olunmuş, mühərriklərinin silindrlərinə nikel-silisium (nikasil) təbəqəsi çəkilmiş avtomobillərə rast gəlmək olur. Zaman keçdikcə nikasil təbəqəsi köhnələrək dağılır və silindrlər blokunu dəyişmək zərurəti yaranır. Qeyd edək ki, BMW kompaniyası bu davamsız təbəqədən istifadə etməklə böyük səhvə yol verdiyini vaxtında anlamışdır. Əksər hallarda nikosil təbəqəli mühərriklər hələ qarantiya müddəti ərzində etibarlı alümin-silisium (alüsil) təbəqəli mühərriklərlə əvəz olunmuşdur. Lakin nikosil təbəqəli aqreqatlara hələ də rast gəlinir. Bu halda mühərrik sıradan çıxdıqda ya yeni silindrlər blokuna 3.000 dollar vermək, ya da çuqun materialdan calaq kimi istifadə etmək lazım gəlir (yeri gəlmişkən, bu da ucuz başa gəlmir). Özü də ustaların çoxu sonuncu əməliyyatın effektivliyinə şübhə ilə yanaşırlar. Buna görə də avtomobil alarkən hökmən onu BMW avtomobilləri üzrə ixtisaslaşmış servis məntəqəsinə sürmək və endoskopun köməyi ilə silindrlər blokunu yoxlatdırmaq lazımdır (nikosil təbəqəsi rənginə görə alüsil təbəqəsindən fərqlənir).

Avtomobili alarkən istismar prosesində mühərrikin həddən artıq qızmaya məruz qalıb - qalmadığını da aydınlaşdırmaq lazımdır, çünki bu halda çox bahalı təmirə ehtiyac yarana bilər. Həddən artıq qızmanın baş verməməsi üçün ildə bir dəfə bamperi çıxararaq radiatoru təmizləmək, habelə ventilyatorun termomuftasının və nasosun sazlığını yoxlamaq lazımdır.

Soyutma sisteminin nisbətən zəif olan digər yeri termostatdır. Elə hallar olur ki, kondisionerin radiatorunun ventilyatoru sınır (kondisionerin radiatoru əsas radiatorun önündə yerləşir) və bunun ucbatından mühərrik qızır. Qeyd etmək lazımdır ki, yuxarıda sadalanan sınma hallarına çox az rast gəlinir, amma bununla belə, həmin yerlərə xüsusi diqqət yetirmək lazımdır ki, sonradan mühərrikin həddən artıq qızması nəticəsində ziyana məruz qalmayasınız.

BMW 5-ci seriya modelindən olan avtomobilləri istismar edərkən yağı dəyişmək üçün avtomaşını hər dəfə servis məntəqəsinə kompüterin “söylədiyi” vaxt deyil, bundan bir az əvvəl, yaxşı olar ki, hər 12-15 min kilometrdən bir sürəsiniz. Sözsüz ki, istifadə olunan yağın keyfiyyəti yaxşı olmalıdır, özü də yalnız istehsalçı zavodun tövsiyə etdiyi yağdan istifadə olunmalıdır.

Ustaların sözlərinə görə BMW Е39 avtomobillərinin mühərrikləri özlərini çox etibarlı mühərrik kimi göstərmişlər. Hər hansı xırda təmiri həyata keçirmək lazım gəldiyi hallarda da çox vaxt yaxşı keyfiyyətli qeyri-orijinal detallar sayəsində böyük xərclərə ehtiyac yaranmır. Ehtiyatlanmaq tələb edən bir şey varsa, o da mühərrikin əsaslı təmiridir. Belə təmir baha başa gəlir, buna görə də BMW 5-ci seriya avtomobilini alarkən mühərriki hərtərəfli diaqnostikadan keçirmək lazımdır. Buna çəkəcəyiniz 50-100 dollar mühərrikdəki ciddi nasazlıq ucbatından çəkəcəyiniz xərclərlə müqayisədə heç nədir.

Rəqiblərdə qibtə hissi doğuran avtomobil

BMW 5 avtomobillərinin bütün versiyalarında istər mexaniki, istərsə də avtomatik transmissiya vardır. Özü də avtomatik transmissiyalı avtomobillərdə 90-cı illərin axırlarından başlayaraq transmissiyanı əllə dəyişməyə imkan verən mexanizm peyda olmuşdur ki, bu da hər iki transmissiya növlərinin üstünlüklərindən yararlanmağa şərait yaratmışdır. 5-ci seriyadan olan avtomobillərin transmissiyası çox etibarlıdır və onların ömrü heç də mühərrikin ömründən az olmur. Lakin onlardan yağın sızmamasına diqqət yetirmək lazımdır. Mexaniki transmissiyalı avtomobillərdə bəndləyici kifayət qədər yaxşı resursa malikdirlər və 150-200 min kilometr məsafəyə davam gətirir (əlbəttə, qəflətən böyük sürət yığmaq həvəskarlarında o, daha tez sıradan çıxır).

BMW 5-ci seriya avtomobillərin sürücüləri yadda saxlamalıdırlar ki, hər dəfə texniki xidmət zamanı yağı dəyişməklə kifayətlənməməli, eyni zamanda asqını diqqətlə nəzərdən keçirməli, kapotun altındakı drenaj dəliklərini üfürüb təmizləməlidirlər və s. Hər hansı detalın nasazlığından şübhələnirsinizsə, yaxşı olar ki, onu dərhal dəyişəsiniz. Əks halda korlanmış bircə detal digər detalların da sıradan çıxmasına səbəb olacaqdır. Qabaq asqı daha çox diqqət tələb edir, burada hər bir təkərə iki rıçaq düşür. Avtomobili sürərkən quyulara və çala-çuxurlara əhəmiyyət verməsəniz, 15-30 min kilometrdən sonra rıçaqlar sıradan çıxacaqdır. Lakin bir qədər diqqətli olsanız, dairəvi bloklu və saylent-bloklu rıçaqlar 70-80 min kilometrədək problemsiz işləyə bilər. Hərçənd ki, bir çox hallarda yuxarı rıçaqların saylent-blokları xeyli tez sıradan çıxır, lakin xoşbəxtlikdən onları ayrıca dəyişdirmək mümkündür.

E39 indeksi ilə buraxılmış BMW 5 seriyalı avtomobillərin istehsalına 4 il bundan öncə son qoyulmuşdur – 5-ci seriyanın son modeli 2003-cü ildə nümayiş etdirilmişdir. Bu isə o deməkdir ki, E39 kuzovlu model hələ uzun müddət əsil güclü avtomobil hesab olunacaqdır. Lakin dərhal qeyd edək ki, E39 kuzovlu BMW 5-ci seriya avtomobilini seçərkən xüsusilə diqqətli olmalısınız. Bunun üçün yetərincə səbəblər vardır. Bu modelin qiyməti bahadır və cəsur insanlar arasında ona müəyyən tələbat vardır. Həm də “bərbad” vəziyyətdə olan avtomobilin alınması o qədər problem yarada bilər ki, bunu düşünmək belə adamı qorxudur. Odur ki, BMW alarkən ehtiyatlı olmağınız sizə yalnız xeyir gətirər. Amma BMW 5 seriyalı avtomobili almaqdan qorxmaq da lazım deyil. Təcrübə göstərir ki, əgər bu avtomobillərdə nasazlıq yoxdursa, o öz sahibinə ciddi problemlər yaratmır.

© 2007 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.