Bəzi zəif yerləri olsa da, Mercedes-Benz GL flaqman adına layiqdir

Просмотров: 6432
Bəzi zəif yerləri olsa da, Mercedes-Benz GL flaqman adına layiqdir
  • Bəzi zəif yerləri olsa da, Mercedes-Benz GL flaqman adına layiqdir
  • Bəzi zəif yerləri olsa da, Mercedes-Benz GL flaqman adına layiqdir
  • Bəzi zəif yerləri olsa da, Mercedes-Benz GL flaqman adına layiqdir
  • Bəzi zəif yerləri olsa da, Mercedes-Benz GL flaqman adına layiqdir
  • Bəzi zəif yerləri olsa da, Mercedes-Benz GL flaqman adına layiqdir
  • Bəzi zəif yerləri olsa da, Mercedes-Benz GL flaqman adına layiqdir

Mən Mercedes-Benz avtomobillərinə həmişə rəğbətlə yanaşmışam, işlənmiş GL avtomobilini diqqətlə öyrəndikdən sonra da bu rəyim qətiyyən dəyişmədi... Zənnimcə, praktiki olaraq, bütün Mercedes-Benz avtomobillərinin yeganə nöqsanlı cəhəti – onların qiymətidir və 2006-cı ildə buraxılmış GL də bu baxımdan istisna deyil.

Avtomobili almağa xeyli vəsait xərcləyən onun gələcək sahibi brendin adına layiq keyfiyyət və xidmət görmək istəyir. GL-də hərəkət etmək reklamda deyilənlərə tam uyğundur – səfər başa çatdıqdan sonra növbəti dəfə bu avtomobilin sükanı arxasına keçəcəyin anı səbirsizliklə gözləyirsən.

Amerika bazarı üçün layihələşdirilən və Tuskaluza (ABŞ) şəhərində istehsal olunan bu avtomobil müasir tendensiyalara (kiçik litraj və qənaətcillik tendensiyalarına) təkəbbürlü şəkildə yuxarıdan aşağıya baxması ilə seçilir. Güclü mühərriklərin sırasını GL 500 (ABŞ-da GL 550) modifikasiyasına quraşdırılan 5,5 litr həcmə və 382 at gücünə malik V8 benzin mühərriki açır. Avtomobilin 6,5 saniyəyə 100 km/saat sürət yığmasını təmin edən bu motor o qədər də "acgöz" deyil. Belə ki, qarışıq hərəkət rejimində 100 km məsafəyə yanacaq sərfiyyatı 13,5 litr, şəhər rejimində isə 18,5 litr təşkil edir. Daha sonra sırada GL 450-yə quraşdırılan 4,6 litr həcmə və 335 at gücünə malik V8 mühərriki və üç dizel versiyası gəlir: 3 litr həcmə və 215 at gücünə malik GL 320 CDI V6 motoru, 3 litr həcmə və 224 at gücünə malik GL 350 CDI V6 motoru və 4 litr həcmə və 302 at gücünə malik V8 motoru. Bütün bu mühərriklər premium-klass ofrouderlərinin kapotunun altında problemsiz işləməlidir, amma ilkin dövrün (2006-2007-ci illərin) modellərinin statistikasına nəzər salsaq görərik ki, burada mühərrikin xarab olması və lazımi qaydada işləməməsi halları yetərincədir. Bu problemlər əsasən balanslaşdırıcı valdakı və qazbölüşdürmə mexanizminin zəncirindəki qüsurlarla əlaqədardır. Qüsurların səbəbini konsern gizli saxlayır, amma bu detalların orijinal nömrələrinin tez-tez dəyişdirilməsi onu göstərir ki, konsern onların keyfiyyətini yaxşılaşdırmaq üçün aktiv fəaliyyət göstərir. Qeyd edək ki, bu fəaliyyət kifayət qədər uğurla nəticələnib. Belə ki, 2008-ci ildə və daha sonra buraxılmış avtomobillərdə bu cür problemlər müşahidə olunmayıb.

Avtomobil sahibinin kifayət qədər vəsait sərf etdiyi detal his filtridir, reqlamentə görə hər 200 min kilometrdən bir onun dəyişdirilməsi tələb olunur. 
2010-cu ildən sonra istehsalçı his filtri olmayan avtomobillər təklif edir. Filtrin olmamasını səsboğucu sistemin borularının və bamperin üzərindəki tünd boz təbəqədən bilmək olar.
İstehsalçı tövsiyə edir ki, Azərbaycanda istismar olunan avtomobillərin yağı hər 10 min kilometrdən bir dəyişdirilsin, çünki burada yanacağın keyfiyyəti aşağıdır. 200-250 min kilometrdən çox məsafə qət etmiş avtomobillərin turbinində problem yaranır ki, bu da sürətyığma zamanı mühərrikin gücünün aşağı düşməsinə və "Chek engine" ("mühərriki yoxla") siqnalının işə düşməsinə gətirib çıxarır. Mühərriki yenidən işə saldıqda bu simptomlar yox olur, amma nasazlıqlar tez-tez meydana çıxdıqda turbinin idarəetmə blokuna vəsait xərcləmək lazım gəlir. Bu blok təmir olunmur və sıradan çıxdıqda turbinlə birlikdə dəyişdirilir.

Avtomat transmissiya
Mühərriklərin bütün variantları ilə birlikdə bu avtomobillərə yeddipilləli avtomat transmissiya quraşdırılır (transmissiyada əl rejimi də nəzərdə tutulub). Bu adaptiv aqreqat sizin avtomobili idarəetmə tərzinizə uyğunlaşır və əla işləyir. Amma bu aqreqatda da xoşagəlməz sürprizlə, yəni hərəkət zamanı taqqıltı və təkanlarla qarşılaşa bilərsiniz. Əsasən 2006-2008-ci illərdə buraxılmış avtomobillər üçün səciyyəvi olan bu problemin həllindən ötrü çox vaxt elektron idarəetmə bloklu avtomat transmissiyanın hidroblokunu dəyişmək lazım gəlir.

ABŞ-da Mercedes-Benz GL daimi tam ötürücü ilə satılır, Off-Road Pro paketi isə əlavə opsiya kimi təklif olunur. Avropada isə Off-Road Pro paketi baza komplektasiyasına daxildir. Klirensin maksimal hündürlüyü 307 mm-dir ki, bu da yol örtüyündəki iri maneələri dəf etməyə imkan verir. Amma yaxşı olar ki, pnevmatik asqının imkanlarından yolsuzluq şəraiti ilə mübarizə üçün deyil, təyinatı üzrə istifadə olunsun. Əks təqdirdə asqının detalları sıradan çıxa bilər və onların əvəzlənməsi üçün xeyli vəsait xərcləmək lazım gələr. Adətən avtomobilin ön amortizasiya dayaqları azı 120 min kilometrədək istismar olunur və konstruksiya xüsusiyyəti ucbatından sıradan çıxır. Qış reagentləri, habelə toz və çirk acınacaqlı nəticələrə gətirib çıxarır. Ümumiyyətlə götürsək, asqı olduqca etibarlıdır, hətta stabilizatorun dayaqlarını yalnız 100 min kilometrdən sonra dəyişmək tələb olunur.

Əyləc sistemi onun üzərinə qoyulan vəzifənin öhdəsindən uğurla gəlir və daşıdığı 2,5 tonluq aqreqatı çətinlik çəkmədən dayandırır. Əyləc kötüklərinin xidmət müddəti orta hesabla 40 min kilometrə qədərdir, disklər isə şəhər rejimində avtomobil sahibinə azı 60 min kilometrədək qulluq edir, trasda isə bu göstərici hətta 100 min kilometr təşkil edir. 

Kuzov və salon
Kuzovun xromlanmış detalları hər il avtomobil sahibi üçün başağrısına çevrilir, çünki onların xromunun bir qədər yeyilmiş görünüşü bahalı ofrouder təəssüratını korlayır. Bu, xüsusən son illərdə buraxılan modellərdə özünü büruzə verir. Görünür, ya xromun keyfiyyəti aşağı düşüb, ya da atmosfer aqressivləşib...

Salonun daxili tərtibatı avtomobilin mənsub olduğu sinfə tam uyğundur. Baqaj bölməsi geniş və iri tutumludur: doğrudur, yeddi oturacaqdan istifadə etdikdə baqaj məkanı 200 litrədək azalır və əlavə oturacaq yerlərinə yol tapmaq rahat deyil, amma əvəzində şəffaf lyuk və DVD-yə baxmaq imkanı (kresloların baş altlıqlarında ekranlar quraşdırılıb) bu çatışmazlıqları kompensasiya edir. 

Plastik materialın cırıltısına, naqillərin çəkilişinə, salon elementlərinin lazımi dəqiqliklə quraşdırılmamasına dair şikayətlər Amerika bazarı üçün istehsal olunmuş avtomobillərə aiddir, Avropa avtomobillərində yığımın keyfiyyəti isə ideal səviyyədədir.

Avtomobilin elektron təchizatı geniş opsiyalarla diqqəti cəlb edir və elektronika əla işləyir. Beləliklə, müəyyən zəif yerlərinin olmasına baxmayaraq, hər halda Mercedes-Benz GL ağır ofrouderlər arasında flaqman adını daşımağa layiqdir və öz təyinatına tam cavab verir: yol örtüyünün keyfiyyətindən və hava şəraitindən asılı olmayaraq sərnişinləri və baqajı sürətlə, təhlükəsiz və komfortlu şəraitdə şəhərlər və ölkələr arasında daşıyır.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.