Avtomobillərlə bağlı bir sıra rüsumlar artırılıb

Просмотров: 2356
Avtomobillərlə bağlı bir sıra rüsumlar artırılıb

Azərbaycanda avtonəqliyyat vasitələrinə dövlət qeydiyyat nişanlarının, sürücülük vəsiqəsinin verilməsi üçün və illik texniki baxışdan keçirilməsinə görə tələb olunan rüsumların məbləği artırılıb. Milli Məclis “Dövlət rüsumu haqqında” qanunda dəyişikliklərlə bağlı qanun layihəsini təsdiqləyib.

Sadə nömrə 22 manat, “zerkalnı” 1000 manat
İlk növbədə qeyd olunmalıdır ki, Milli Məclis bahalı alındığı söylənilən nömrə nişanlarını almağı leqallaşdırıb. Yəni bahalı nömrələrə yüksək rəsmi qiymət qoyulub.
Dəyişikliyə görə, rəqəm və ya hərflərin kombinasiyası istisna olmaqla, digər dövlət qeydiyyat nişanlarının verilməsinə görə tələb olunan dövlət rüsumunun məbləği 18 manatdan 22 manata qaldırılıb.

Rəqəm və ya hərflərin kombinasiyası üzrə rüsumlar isə daha yüksəkdir. Belə ki, dövlət qeydiyyat nişanında əks olunmuş rəqəmlərin kombinasiyası 001, 002, 003, 004, 005, 006, 007, 008, 009 üzrə seriyası müxtəlif hərflərdən ibarət olduqda 1500 manat, seriyası eyni hərflərdən ibarət olduqda 2500 manat, 100, 200, 300, 400, 500, 600, 700, 800, 900 üzrə seriyası müxtəlif hərflərdən ibarət olduqda 1000 manat, seriyası eyni hərflərdən ibarət olduqda 1500 manat və 111, 222, 333, 444, 555, 666, 777, 888, 999 üzrə isə seriyası müxtəlif hərflərdən ibarət olduqda 500 manat, seriyası eyni hərflərdən ibarət olduqda 1000 manat müəyyənləşdirilmişdir.

Həmçinin, rəqəm və ya hərflərin kombinasiyası da daxil olmaqla, dövlət qeydiyyat nişanının təkrar verilməsinə görə rüsumun məbləği 22 manat müəyyənləşdirilib.
Motonəqliyyat vasitələri, traktor, tikintidə, meşə və kənd təsərrüfatında, başqa işlərdə istifadə üçün nəzərdə tutulan özügedən maşınlar, texnoloji, yarış məqsədli idman və digər mexaniki nəqliyyat vasitələri, onların qoşqu və yarımqoşquları üçün dövlət qeydiyyat nişanlarının verilməsinə görə 11 manat məbləğində rüsum ödəniləcək.

“Texpasport” 17 manat, sürücülük vəsiqəsi 18 manat
Həmçinin, avtonəqliyyat vasitələrinə qeydiyyat şəhadətnamələri üçün nəzərdə tutulan rüsumların məbləği artırılıb.
Belə ki, avto-moto nəqliyyat vasitələri üçün rüsum 15 manatdan 17 manata qaldırılıb.
Bundan başqa, yol şəbəkəsinin müəyyən hissələrinə yük daşıyan nəqliyyat vasitələrinin və avtobusların buraxılması barədə xüsusi buraxılış vəsiqələrinin verilməsi üçün tələb olunan rüsumun məbləği 5 manatdan 10 manata qaldırılıb.
Sürücülük vəsiqəsinin verilməsi və ya sürücülük vəsiqəsinin dəyişdirilməsi üçün bəzi rüsumlar da artırılıb.
Belə ki, sürücülük vəsiqəsinin verilməsinə görə rüsumun avto-moto nəqliyyat vasitələri üçün 15 manatdan 18 manata artırılıb.
Qanuna edilən yeni əlavəyə görə, traktor, tikintidə, meşə və kənd təsərrüfatında, başqa işlərdə istifadə üçün nəzərdə tutulan özügedən maşınlar, texnoloji, yarış məqsədli idman və digər mexaniki nəqliyyat vasitələri, onların qoşqu və yarımqoşqularının idarə edilməsi üçün sürücülük vəsiqəsinin verilməsi və dəyişdirilməsinə görə rüsum 5 manat müəyyən edilib.

Texniki baxış üçün rüsumun məbləği 2 dəfə artırılıb
Nəqliyyat vasitələrinin illik texniki baxışdan keçirilməsinə görə dövlət rüsumunun məbləği isə 10 manatdan 20 manata qaldırılıb.
Moto nəqliyyat vasitələri, traktor, tikintidə, meşə və kənd təsərrüfatında, başqa işlərdə istifadə üçün nəzərdə tutulan özügedən maşınlar, texnoloji, yarış məqsədli idman və digər mexaniki nəqliyyat vasitələri, qoşqular, yarımqoşqular üçün nəzərdə tutulan rüsum 5 manatdan 10 manata yüksəldilib.
Nəqliyyat vasitələrinin texniki uçot göstəricilərinə dəyişikliklər edilməsi zamanı və ya nəqliyyat vasitəsi alıcısının tələbi ilə nəqliyyat vasitələrinə texniki baxış keçirilməsi üçün rüsum 10 manatdan 20 manata qaldırılıb.
Qeyd edək ki, rüsumların artırılmasını nəzərdə tutan qanun Azərbaycan Prezidenti İlham Əliyev tərəfindən imzalandıqdan sonra qüvvəyə minəcəkdir.

Seymur Yunusov

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.