Avtomobildə uşaq

Просмотров: 10178
Avtomobildə uşaq
  • Avtomobildə uşaq
  • Avtomobildə uşaq
  • Avtomobildə uşaq

Öz uşaqlarınızla avtomobildə gəzintiyə çıxmaq fikrinə gəlmisiniz? Çalışın ki, onların avtomobilin salonunda maksimum rahatlığını və ən əsası da təhlükəsizliyini təmin edəsiniz.

2011-ci ilin statistik məlumatlarına əsasən, uşaqların iştirak etdiyi qəzaların sayı 1,5% artıb. Keçən illə müqayisədə həddi-büluğa çatmayan uşaqlarda ölüm halları 1,8% azalıb, ağır zədələnmə halları isə 1,7% artıb.

Hadisələr zamanı zərər çəkmiş uşaqların bir çoxu bilavasitə avtomobilin salonunda olan uşaqlardır. Qəzaların böyük əksəriyyəti böyüklərin günahı üzündən olur. Valideynlərin ən geniş yayılmış səhvlərindən biri balaca sərnişinləri uşaq kresloları olmadan daşıması hesab edilir. Bəzən analar ön oturacaqda oturub uşağı qucağında saxlamağı daha təhlükəsiz hesab edirlər. Amma belə halda qəza vaxtı uşaq ön şüşəyə çırpıla və ya təhlükəsizlik yastıqlarının açılması zamanı ölümcül zərbə ala bilər.
Statistika sübut edir ki, baş vermiş qəzalar zamanı avtokreslolar uşaqları travmalardan qoruya bilmişdir.

Uşaq avtokreslosu – təzə doğulduğu vaxtdan etibarən 12 yaşına kimi uşaqların avtomobildə daşınması üçün nəzərdə tutulmuş xüsusi oturacaqdır. Daha dəqiq desək, 36 kq-a qədər balaca sərnişinlərin təhlükəsiz daşınması üçün təyin edilmişdir. Yol Hərəkəti Qaydalarında o, saxlayan qurğu adlanır ki, bu da onun mahiyyətini tamamilə doğru əks etdirir. Aparılan tədqiqatlara əsasən, bütün dünyada uşaq avtokreslosu qəza zamanı ciddi travmaların olması şansını azaltmağa və maşında uşağın maksimal təhlükəsizliyini təmin etməyə şərait yaradır. Bundan başqa, 12 yaşına qədər bütün uşaqların avtokreslolarla daşınması məcburidir.

Odur ki, uşaqların təhlükəsizliyini tam formada təmin etmək üçün avtokreslolar yaş qrupuna və çəkiyə görə beynəlxalq standartlara əsasən 3 formada qruplaşdırılıb.
I-qrup: 0-13 kq və ya 0-12 ay – bu müddətdə arxaya doğru baxan, (yəni avtomobilin gediş istiqamətinin əksinə olan uşaq avtokreslolar məsləhət görülür.

II-qrup: 9-18 kq və ya 1-4 yaş – bu müddətdə həm arxaya, həm də önə baxan avtokreslolardan istifadə oluna bilər. Mütləq uşağın qarşısındakı təhlükəsizlik kəmərləri bağlanmalıdır.

III-qrup: 15-36 kq və ya 4-11 yaş – bu müddətdə isə arxası yüksək olan avtokreslo və ya dəstək avtokreslo ilə qorunmalıdır. Eynilə təhlükəsizlik kəmərləri də bağlanmalıdır. Həmçinin təhlükəsizlik kəməri heç bir zaman qolun altından keçməməlidir.

Beləliklə, bir çox valideynləri narahat edən digər sualları sahə üzrə ekspertimiz cavablandırdı:

1.  Avtomobilin hərəkət istiqaməti üzrə qurulan avtokreslolardan nə vaxta kimi istifadə etmək olar?
-  Uşağın böyüyüb avtokreslonun söykənəcəyindən daha hündür olduğu zaman. Təxminən 3 yaşdan sonra.

2.   Avtokreslonun balış yerinə adi balış üzərində uşağı oturtmaq olarmı?
-   Xeyr. Adi balış çox yumşaqdır. Qəza anında o irəli sürüşə və ya yastı ola bilər və təhlükəsizlik kəmərinin altından asanlıqla sürüşüb çıxa bilər.

3.  Uşaq öz avtokreslosunda oturmaq istəmədiyi zaman nə etmək lazımdır?
-    Mütləq onu razı salmalısınız.

4.  Hansı müddətdən sonra avtokreslodan istifadə  edilmir?
-    Uşağınızın boyu 150 sm olduqdan sonra.

5.  Avtokreslonu ön oturacaqda quraşdırmaq olarmı?
-   Olar. Lakin bu zaman mütləq hava yastıqları söndürülməlidir. Çünki qəza zamanı uşaq üçün çox təhlükəli vəziyyət yarada bilər. Amma yaxşı olar ki, arxa oturacağa quraşdırılsın.

Ümumiyyətlə, valideynlərə məsləhətim olardı ki, mütləq avtokreslolardan istifadə etsinlər və bu sahədə qətiyyən qənaət etmək olmaz. Əgər salonda balaca sərnişin varsa, sürət həddini aşmayın və maksimal dərəcədə diqqətli olun. Həmçinin qətiyyən sükanı idarə edə-edə geriyə çevrilib uşağa baxmayın.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.