Avtomobil sığortasında dələduzluq halları

Просмотров: 2137
Avtomobil sığortasında dələduzluq halları

Hiyləli qəzalar və oğurluqlar sığorta şirkətlərinə maddi zərər vurur

Dələduzluq halları sığorta sektorunda tanınmış problemlərdən biridir. Sığortanın bir çox sahələrində, xüsusilə əmlak, yüklərin və avtomobillərin sığortası zamanı dələduzluq hallarına tez-tez rast gəlinir. Dələduzluq oyunları düzülüb-qoşularaq sığorta şirkətlərindən təzminat alınır. Müasir dünyamızda sığorta şirkətləri dələduzluq hallarına qarşı nə qədər ayıq-sayıq olmalarına baxmayaraq, şirkətlər hələ də fırıldaqçıların qurbanları olurlar.

Bəs nədir sığorta dələduzluğu, bu necə baş verir?

Sığorta şirkətlərinin maddi maraqlarına zərər vuran dələduzluq hərəkətlərinin törədilməsinin  müxtəlif vasitələri və üsulları vardır. Məsələn, bir neçə il əvvəl Rusiyanın Omsk şəhərində belə bir hadisə olub. Dələduzluqla məşğul olan dəstənin üzvlərindən birinin atasının maşınını elə öz oğlunun təkidilə sığortalayırlar.
 
Bir müddət sonra avtomobili etibarnamə ilə idarə edən oğlu avtomobili əzir. Avtomobil oğurluqdan sığortalandığı üçün dələduzlar oğurluq səhnəsi yaradaraq, avtomobili yox edirlər. Dələduzun atası isə bütün olanlardan şübhələnməyərək, sığorta hadisəsi barədə ərizə verir və sığorta ödənişi alır.

Dələduzluğun başqa bir üsulu avtomobilə quraşdırılmış bahalı avadanlıqların sığortası  zamanı həyata keçirilir. Belə ki, dələduzlar əvvəlcədən müvəqqəti olaraq bahalı avadanlıqları avtomobilə quraşdırırlar.

Sığorta şirkətinin əməkdaşı avtomobilə baxış keçirdikdən sonra həmin bahalı avadanlıqlar sökülüb götürülür. Daha sonra isə oğurluq səhnəsi yaradılaraq, sığorta şirkəti aldadılır. Qeyd edək ki, avadanlıqlar nə qədər bahalı olarsa, sığorta şirkətindən alınacaq ödəniş də bir o qədər yüksək olacaqdır.

Park vəziyyətində olan avtomobillərin əzilməsi hallarından sui-istifadə də artmaqdadır. Məsələn, birisi avtomobilini park etmiş, bir digəri isə geri çıxarkən həmin avtomobili vurmuşdur. Adətən vuran avtomobil yük avtomobili olur və həmin avtomobil heç bir zərər görmür. Amma park vəziyyətində  olan avtomobilə ziyan dəyir. Daha sonra yük avtomobilinin sahibi ilə razılaşıb onun sığorta polisindən sığorta şirkətindən ödəniş tələb olunur.

Sığorta dələduzluğunun qarşısının alınması üçün sığorta şirkətlərinin qarşılıqlı işləməsi və bazar məlumatlarının araşdırılması bu baxımdan vacibdir. Sığorta respublikamızda gənc sahələrdən biri olduğundan bu sahəyə kömək məqsədilə məlumat mərkəzi yaradılmalıdır.

Həmin mərkəz mütəmadi olaraq sığorta şirkətlərini lazımi informasiyalarla təmin etməlidir. Sığorta şirkətləri də tariflərini formalaşdırarkən və sığorta hadisəsi baş verərkən həmin informasiyalardan faydalanmalıdırlar.

Respublikamızda il ərzində avtomobillərlə bağlı neçə ədəd sığorta polisi satıldığı, neçə ədədinin sığorta hadisəsi törətdiyi, avtomobillərin neçəsinin öndən, arxadan və yanlardan vurulduğu və s. barədə məlumatlar geniş işlənilmir. Məsələn, qardaş Türkiyədə TRAMER adlı qurum bu işi görür.

Həmçinin ölkəmizdə vahid qəza ssenarilərinin işlənib hazırlanmasına ehtiyac var. Məlumatların və qəza ssenarilərinin işlənib hazırlanması ehtimal olunan dələduzluğun vaxtında qarşısının alınmasında sığorta şirkətlərinə kömək edər.

Sonda qeyd edək ki, 2008-ci ildə avtomobil vasitələrinin sığortasından təqribən 60 milyon manat sığorta haqqı toplanmışdır. Bu sahədə sığorta ödənişləri isə 18 milyon manat olmuşdur. Həmin 18 milyon manatdan sığorta dələduzlarının faydalanıb-faydalanmadığını isə demək çətindir.



Seymur Yunusov


© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.



Şərhlərin sayı: 0

AVATAR
Hələ heç kim şərh verməyib. Birinci siz olun.