Avtokredit şərtləri “yumuşalıb”

Просмотров: 12694
Avtokredit şərtləri “yumuşalıb”
  • Avtokredit şərtləri “yumuşalıb”

“Minimum  ilkin ödəniş”, “ən aşağı faiz dərəcəsi”, “ən uzun kredit müddəti”: Hazırda avtomobil kreditləri belə şuarlar ilə cazibədar göstərilməyə çalışılır. Hətta avtomobillər “faizsiz kredit” deyilən bir satış yolu da alıcılara təklif olunur. Bəs görəsən deyilənlər doğrudurmu? Həqiqətən kredit faizləri münasibdir?

Faizlər 8-14 % aşağı salınıb

Bankların avtomobillərin kreditləşməsi ilə bağlı fəaliyyətlərinə nəzər saldıqda görünür ki, bir çox bankarda şərtlər iki il əvvəllə müqayisədə xeyli dəyişib. Kreditin müddəti və ilikin ödənişdə elə bir dəyişiklik olmasa da faizlər aşağı salınıb. Əvvəllər mövcud olmuş 26-30 faizli kreditlər daha yoxdur. Belə ki, kredit faizləri 2008-ci illə müqayisədə 8-14 faiz azalaraq 16-22 faizə düşmüşdür. Belə banklardan “Bank Standard”ın, “Bank of Baku”ın, “NBC Bank”ın adlarını çəkmək olar.

Avtomobilin dəyəri, kreditin məbləği, ilkin ödəniş, kreditləşiriləcək avtomobilin yeni və köhnə olması kimi şərtlər kredit faizinə təsir göstərir. Bir qayda olaraq banklar kredit məbləği və ilkin ödəniş artdıqca kredit faizini artırırlar. Məsələn, “Bank Standard” yeni avtomobillər üçün ilkin ödəniş 50 % olduqda kreditin dərəcəsini 16% müəyyən etmişdir. İlkin ödənişi 25 faiz ödəmək imkanında olan müştərilər üçün isə avtokredit 19 faizlə verilir.

Banklar kreditləşdiriləcək avtomobillər siyahısın müəyyənləşdiriblər

Bu gün banklar istənilən marka və modeli kreditləşdirmirlər. Hazırda banklar daha çox rəsmi diler və distribütorlarla işləməyə üstünlük verirlər. “Xüsusi proqramlar” üzrə rəsmi satış mərkəzlərindən avtomobil alışışı maliyyələşdirilir.  Məsələn, “Bank of Baku”  “Hyundai”, “KİA”, “Volkswagen” və “Chevrolet” markalı avtomobillərin alışının kreditləşdirilməsi layihələrini  həyata keçirir. İşlənmiş avtomobillərin kreditlə alınmasına gəldikdə isə hazırda buraxılış ili 2000-ci ildən aşağı  olan avtomobillər üçün kredit ayrılmır. Hətta bir sıra model avtomobillərin buraxılış ili 2005-ci ildən, Rusiya istehsalı olan avtomobillərin buraxılış ili isə 2007-ci ildən yuxarı olmalıdır. Həmçinin Rusiya istehsalı olan avtomobillər maksimum 24 ay müddətinə və  21-22 faizlə  kreditləşdirilir.

Lizinq kreditdən fərqlənmir

Hazırda yerli avtolizinq şərtləri avtokredit şərtlərindən heç də fərqlənmir. Lizinq şirkətlərinin təklif etdiyi şərtlər həm müddət həm də faiz dərəcəsi baxımından bankların şərtləri ilə eynidir. Məsələn, cəlb etdiyi 2 milyon manatlıq vəsaitlə avtolizinq proqramını həyata keçirən “Joint Leasing” şirkətindən avtomobilləri illik faiz dərəcəsi 19-20 %, ilkin ödəniş 20%, müddəti isə 36 ay olmaqla lizinqə götürmək mümkündür. Avtomobillərin qiymətinə isə məhdudiyyət qoyulmur. “Uni Lizinq” şirkəti isə avtolizinqi genişləndirmək üçün lizinq ilə satış üzrə mərkəzləşdirilmiş avtosalonu istifadəyə vermişdir. Avtosalonda müştərilərə avtomobillərin dəyərinin 10%-dən başlayaraq ilkin ödəniş etməklə 60 ay müddətinə qədər minik avtomobilləri təklif edilir.

Bəs kredit şərtlərinin daha da “yumuşalmasına” ehtiyac varmı? İqtisad elmləri doktoru, professor Zahid Məmmədovun “Avtomobil.az”ın sualına cavabı belə oldu:  “Kredit faizlərini aşağı salmaqdansa servis xidmətlərinin və ehtiyat hissələrinin qiymətlərini aşağı salsalar daha yaxşı olar. Kredit faizinə görə artıq ödənilən pul sonradan servis xidmətləri üçün ödəniləcək vəsaitin yanında heçnədir. Kreditlə avtomobil satıldıqda müştəri satıcıdan asılı vəziyyətə salınır. Karl Marksın sözü ilə desək alıcı “görünməz tellərlə” satıcıya bağlanır”.

Bir çox alıcılar da avtomobil krediti yerinə  nəğd pul kreditinə üstünlük verirlər.  Buraxılış ili  2000-ci ildən aşağı olan avtomobili almaq,  kasko sığortasını azad seçmək və həmin avtomobili sonrada asan satmaq  istəyənlər nəğd pul kreditini seçirlər.

Seymur Yunusov

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir. 

Şərhlərin sayı: 0

AVATAR
Hələ heç kim şərh verməyib. Birinci siz olun.