Audi Azərbaycanda yeni səhifə açır

Просмотров: 2348
Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır
  • Audi Azərbaycanda yeni səhifə açır

Bu yaxınlarda  “Kres GMBH” şirkəti  Audi avtomobillərinin ölkəmizdə rəsmi distribütoru səlahiyyətini “European Cars” şirkətinə təhvil verib. Bununla əlaqədar olaraq yeni rəsmi təmsilçi Audi-nin Azərbaycan bazarında daha da irəliləməsi üçün aktiv fəaliyyətə başlayıb.

Azərbaycanda premium avtomobil bazarının gələcəyinə təsir edə biləcək bu hadisə ilə əlaqədar Avtomobil.az European Cars şirkətinin Marketinq meneceri Əli Əhədovdan müsahibə alıb.

Avtomobil.az: Əli bəy, bu gün avtomobil markaları arasında rəqabətin həddindən çox artdığı bir zamanda Audi hansı üstünlükləri ilə önə çıxır?

Əli Əhədov: İlk əvvəl onu qeyd edim ki, Audi modelləri nüfuzuna, üslubuna və ən əsası idarəolunmasına görə öz rəqiblərindən seçilir. Dünyada yalnız Audi-yə məxsus olan və misli olmayan Quattro tam ötürücülü sistemi bizim avtomobilləri bütün digər brendlərdən fərqləndirir. Həmçinin Audi brendinin eksklüziv avtomobillərə xüsusi diqqət verməsilə də bunu təsdiqləmək olar. Bizim avtomobillərə nəzər saldıqda aqressiv dizayna məxsus idman üslubu və premium sinfə məxsus olan opsiyalar toplusu gözə çarpır. Audi ralli-idman avtomobilləri arasında bir neçə birinciliyə məxsusdur: ilk turbinləşdirilmiş mühərrik, ilk alüminium gövdə, ilk tam ötürücü (quattro). Bütün bu ənənələrə sadiq qalaraq Audi avtomobilləri öz sahiblərini idarəetmədən zövq almağa məcbur edir. Müasir Audi ailəsinin üz görünüşü onu istənilən məsafədən tanımaq imkanı verir. Bir sözlə, Audi sahibləri istənilən halda kütlədən seçilirlər.

Avtomobil.az: Audi-nin Babək prospekti 43A ünvanında yerləşən yeni sərgi salonu Bakıdakı ən iri salonlardan biridir. Bildiyimiz kimi, Audi-nin alıcıları daha yüksək səviyyədə xidmətlər gözləyən insanlardır. Bu baxımdan, sərgi salonunuz hansı imkanlara malikdir?

Əli Əhədov: Nəzərə almaq lazımdır ki, hazır ki, salon iri olmasına baxmayaraq müvəqqətidir. Yaxın gələcəkdə yeni Audi terminalının tikilib başa çatacağı gözlənilir. Bu ərəfədə tikinti başa çatana qədər bu şou-rum fəaliyyət göstərəcək. Biz alıcılarımıza yüksək səviyyəli xidmət göstərmək iqtidarındayıq. Müştərinin qarşılanmasından, avtomobilin təhvil verilməsinə kimi hər şey standartlara uyğun həyata keçirilir.

Avtomobil.az: Avropada borc böhranının davam etdiyi bir şəraitdə Audi bu qitədə satışlarını artırmağı bacarmış az sayda istehsalçılardan biridir. Bəs, ölkəmizdə Audi avtomobillərinə tələb hansı səviyyədədir? Audi Bakı Mərkəzi bu il neçə ədəd avtomobil sifarişi gözləyir?

Əli Əhədov: Avropada Alman avtomobilləri arasında Audi-nin satışları 1-ci yerdədir. İnanırıq ki, ölkəmizdə də bu markaya tələb lazımi səviyyədə olacaq. Çünki Audi modellərini həm yayda, həm də pis hava şəraitində əminliklə idarə etmək mümkündür. Audi tam ötürücü sistemi və bir sıra inovativ elektron sistemlər qarlı və buzlu yollarda avtomobilin sürüşməsinin və idarəetməni itirməsinin qarşısını alır. Ölkəmizdə Audi avtomobillərinin satışına gəldikdə isə, bu ilin sonunadək təxminən 200 avtomobil artıq sifariş olunub.

Avtomobil.az: Audi bu il 1,2 milyon avtomobil satacağını proqnozlaşdırır. Həmçinin 2015-ci ilə kimi bütün rəqiblərini satış həcminə görə qabaqıamağı qarşısına hədəf qoyub. Bu iddialara qarşı, xeyli müddətdir Audi Azərbaycan bazarında sanki passivlik göstərir. Əslində vəziyyət necədir?

Əli Əhədov: Bəli. Audi qarşısına bu məqsədi qoymuşdur. Buna əyani sübut Audi model sırasının durmadan artmasıdır. Əgər fikir versəniz, Audi-nin hər şəraitə, hər zövqə uyğun modelləri mövcuddur. Bu da müştərilərə daha geniş seçim imkanı verəcək. Azərbaycan bazarına gəldikdə isə nəzərinizə çatdırım, biz Audi avtomobillərini Azərbaycanda təmsil edən yeni nümayəndəliyik. Bizim üçün Audi-nin Azərbaycandakı fəaliyyəti bu andan başlayır. Bizə qədər isə bu brend bizim firmaya məxsus olmadığına görə məlumatım yoxdur.

Avtomobil.az: Bu ilin yazında yenilənmiş Audi A4 bazara çıxarıldı. Bu yeni model Azərbaycanda da müştərilərə təklif olunur?

Əli Əhədov: Yeni A4 modelinin bu ayın axırına qədər salonumuza gətiriləcəyi gözlənilir. A4 yerli bazarda hələlik 2 variantda təqdim olunacaq - 1.8 və 2.0 litr həcmli turbin mühərrikli. Hər iki halda avtomobilin təchizatı olduqca zəngindir. 2.0 litrlik mühərriklə avtomobilin 0-100 km/saat göstəricisi 6.9 saniyədir. 1.8 litrlik mühərrik isə bu göstərici 8.3 saniyədir. Bu versiya şəhərdə cəmi 7 litr benzin sərf edir.

Avtomobil.az: 27 Sentyabr - 14 Oktyabr tarixlərində Paris Motors Show beynəlxalq Avtomobil sərgisi keçiriləcəkdir. Audi-nin bu sərgiyə hansı yeniliklərlə qatılacağı gözlənilir?

Əli Əhədov: Paris avtomobil sərgisində S3 modelinin yeni 3-cü nəsli təqdim olunacaq. Bildiyimiz kimi S3 yeni A3 modelinin bazasında daha da gücləndirilmiş və idman uslubunda olan versiyadır. Onun çəkisi 80 kq azalmış, uzunluğu isə 22 mm artmışdır. S3 hetçbeki 280 at gücü hasil edən 2.0 litrlik turbo mühərriklə və onunla tandemdə 7 pilləli DSG sürət qutusu ilə təchiz olunub. Bununla da 0-dan 100 km/saata qədər sürətlənmək 5.5 saniyəyə baş verir. Bu avtomobil rəsmi olaraq gələn ilin əvvəllərində satışa çıxarılacaq.

Eyni zamanda bu yaxınlarda Audi daha bir yeni  modelini təqdim etdi: RS5 kabriolet. Çoxdan gözlənilən bu kabriolet RS həvəskarlarının tam ürəyincə oldu. Avtomobil 4.2 litrlik 450 at gücü hasil edən mühərriklə təchiz olunub. 7 diapazonlu DSG sürət qutusunun köməkliyi ilə RS5 100 km/saat sürətini cəmi 4.9 saniyəyə yığır. Dam örtüyünün yığılması isə 15 saniyəyə baş verir.

Avtomobil.az: Azərbaycana Audi avtomobilləri Macarıstandakı zavoddan alınaraq gətirilir, yoxsa Almaniyadan?

Əli Əhədov: Hal - hazırda idxal etdiyimiz bütün modellər Almaniyadan gətirilir.

Avtomobil.az: Hazırda hansısa sərfəli satış kampaniyanız mövcuddurmu?

Əli Əhədov: Müştərilər illik 14%-dən başlayan əlverişli kredit şərtlərilə bütün Audi modellərini əldə edə bilərlər. Eyni zamanda satılan hər bir avtomobilə 2 il və məhdudiyyətsiz yürüş zəmanəti verilir, 1 illik sığorta və 1 illik servis xidməti hədiyyə olunur.

Avtomobil.az: Azərbaycanda Audi-nin ən çox hansı modelləri bəyənilir?

Əli Əhədov: Hər modelin özünəməxsus müştəriləri mövcuddur. A8 modeli premium səviyyəli müştərilər tərəfindən daha çox bəyənilir. Xüsusən, arxa sıradakı komfort, enterteyment, bir sıra funksiyaların arxa konsoldan idarəolunması və avtomobilin istənilən şəraitdə stabilliyi premium avtomobil alıcılarının nəzərinə daha tez çarpır. Bildiyiniz kimi yerli bazarda kiçik və tam ölçülü krossoverlərə geniş yer verilir. Audi müştərilərə 3 müxtəlif ölçüdə krossover təqdim edir: Q3, Q5, Q7. Dizayn, təchizat və dinamikasıyla rəqiblərindən seçilən bu avtomobillər Azərbaycan bazarında özünəməxsus yer tutacağına əminik. Daha çox idman üslubuna və dinamikaya üstünlük verən cavan nəsil üçün A5 modeli daha məqsədəuyğundur. Eyni zamanda  kompakt sedan və biznes sedan həvəskarları üçün müvafiq olaraq A4, A6 modelləri satışa çıxarılıb. Hetçbek əldə etmək istəyənlərə demək istərdim ki, çox yaxında A3 modelini də salonumuzda görə biləcəksiniz.

Avtomobil.az: Yaxın gələcəkdə yeni satış və servis mərkəzinin açılacağı gözlənilirmi?
Əli Əhədov: Qeyd etdiyim kimi yeni Audi terminalının inşasına start verilib. Bu terminal olduqca böyük şou-ruma və həm də yeni servisə malik olacaq və Bakıdakı ən böyük satış və servis mərkəzi  sayılacaqdır. Terminalın 2014-cü ildə istifadəyə verilməsi planlaşdırılır.
Avtomobil.az: Əli bəy, müsahibə üçün təşəkkür edirik. 

Müsahibəni apardı: Seymur Yunusov


© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.