Audi A9: ispan dizaynerindən gələcəyin avtomobili

Просмотров: 4404
Audi A9: ispan dizaynerindən gələcəyin avtomobili
  • Audi A9: ispan dizaynerindən gələcəyin avtomobili
  • Audi A9: ispan dizaynerindən gələcəyin avtomobili
  • Audi A9: ispan dizaynerindən gələcəyin avtomobili
  • Audi A9: ispan dizaynerindən gələcəyin avtomobili
  • Audi A9: ispan dizaynerindən gələcəyin avtomobili

Öncədən qeyd edək ki, bu modelə Audi mütəxəssislərinin heç bir aidiyyəti yoxdur, o, bütünlüklə məşhur ispan dizayneri Daniyel Qarsiyanın təşəbbüsünün məhsuludur. Belə ki, Daniyel gələcəyin avtomobili barəsində mülahizələrini ətrafdakılarla bölüşməyi qərara alıb. Bu futurist konseptinin yaradılmasına Qarsiyanı onun məşhur həmyerlisi, dahi memar Santyaqo Kalatravanın yaradıcılığı ruhlandırıb.

Nanotexnologiya sənayesinin sürətli inkişafı ilə əlaqədar olaraq, Qarsiya öz layihəsinə kifayət qədər cəsarətli variantlar daxil edib. Amma onlar nə qədər cəsarətli variantlar olsa da, elmin və texnikanın son nailiyyətlərinin işığında onların həyata keçirilməsi heç də qeyri-mümkün deyil.

Məsələn, Daniyel Qarsiyanın hazırladığı Audi A9-un özünəməxsus xüsusiyyəti kuzova “elektron boya” deyilən boya çəkilməsindən ibarətdir. Elektron boya texnologiyası avtomobilin sahibinə imkan verir ki, düyməni bircə dəfə basmaqla avtomobili istədiyi rəngə boyasın.

Boya örtüyünün özünübərpa xüsusiyyəti sayəsində avtomobilin çatlardan, cızılmalardan, hətta  kiçik qəzalardan qorxusu yoxdur. Belə ki, avtomobil zədələndikdə kuzov avtomatik olaraq səthinin hamarlığını bərpa edir (əlbəttə, əgər söhbət ciddi zədələrdən getmirsə).

Çirk və toz da problem deyil – kuzovun səthi istənilən çirkləri kənarlaşdırır və avtomobil elə görünüş alır ki, sanki konveyerdən indicə çıxıb.

Konseptin panoramlı dam örtüyü də bu xüsusiyyətə malikdir. Yeganə fərq ondadır ki, dam örtüyü üçün şəffaf hala düşə bilən daha yüksək texnologiyalı nanomaterial tələb olunur.

Bu cür avtomobilin kapotunun altında hibrid mühərrikin quraşdırılması təəccüblü deyil. Hibrid mühərrikə yardım üçün hər bir təkərdə müstəqil elektromotorlar quraşdırılıb. Onlar batareyaların doldurulması üçün əyləclənmənin inersiya enerjisindən istifadə edirlər (bu texnologiya Lighting GT, Tesla Roadster kimi hazırkı elektromobillərdə uğurla istifadə edilir).

Onu da qeyd etmək lazımdır ki, Qarsiyanın öz konseptinə quraşdırdığı bütün detallar, bütün nanotexnologiya məhsulları və materiallar ya artıq yaradılıblar və istifadə olunurlar (məsələn, özü-özünü bərpa edən kuzov), ya da hazırlanma mərhələsindədirlər (elektron boya texnologiyası artıq hazırlanma mərhələsindədir, dam örtüyü üçün nanotexnologiyaya əsaslanan, şəffaflıq əmsalını dəyişməyə qadir olan  material isə hələ heç kim tərəfindən hazırlanmayıb). Odur ki, avtomobili ilk baxışdan göründüyü kimi tam futurist model adlandırmaq da doğru olmazdı. Tamamilə mümkündür ki, yaxın gələcəkdə Audi şirkəti Qarsiyanın ideyasından istifadə edəcək. Baxmayaraq ki, dizayner özü bu avtomobili istehsal etməyin qeyri-real olduğunu deyir.

 © 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.   

Şərhlərin sayı: 0

AVATAR
Hələ heç kim şərh verməyib. Birinci siz olun.