Audi A5 Sportback

Просмотров: 1677
Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback
  • Audi A5 Sportback

Bu avtomobilə nəzər saldıqdan sonra onun çox gözəl olduğunu təsdiqləməmək olmur. O, lakonik, ciddi və eyni zamanda, zərif və yaraşıqlı cizgiləri ilə seçilir. Bu sinfin ilk təmsilçisi bir vaxtlar Mercedes-Benz CLS sedan-kupesi olub. Sonra VW Passat CC işıq üzü görüb. Amma əsl avtomobil həvəskarlarının ürəyini fəth etmək üçün Passat CC-in imicində hansısa incəliklər çatışmırdı. Xalq avtomobili statusu zərif, gözəl avtomobil imicinin yaradılmasına o qədər də kömək etmir. Zənnimcə, A5 kupesindən sonra Audi A5 Sportback ən gözəl avtomobillərdən biridir. Onu da qeyd edək ki, kuzovunun tipinə görə, Audi A5 Sportback arxa qapısı yuxarıya açılan hetçbekdir. 

Audi A5 Sportback-in ön hissəsi kupe üslubunda hazırlanıb, amma kupeyə bənzərlik ön dayaqlara qədərdir, ondan arxaya qədər nəzər saldıqda isə tamamilə başqa cizgilər nəzərə çırpır. Belə ki, dam örtüyü kəskin şəkildə aşağıya doğru meyllənir və baqaj bölməsinin səliqəli "quyruq" hissəsinə keçir. Uzadılmış təkər bazası və dörd kiçik qapını da qeyd etmək lazımdır. Özü də qapıların şüşələri çərçivəsiz üslubda hazırlanıb. Bunun sayəsində qapılar açılanda avtomobil olduqca gözəl görünür.

Bütün bunlar eksteryerə aid məqamlardır. Bəs interyerdə nələr var? Dizaynerlər velosiped icad etmək yolu ilə getməyərək, çoxdan sınaqdan çıxmış metod əsasında işləyiblər. Yaraşıqlı və bahalı interyerdə cihazlar panelində vertikal oxlar, mərkəzi konsolda MMI joystiki, rəngli iri displey və əla materiallar diqqəti cəlb edir. Erqonomika ideal səviyyədə olmasa da, hər halda ona çox yaxındır. Alçaqda quraşdırılmış kreslolar rahat əyləşməyə qətiyyən mane olmur. İstər sükanı, istərsə də oturacaqları geniş diapazonlarda tənzimləmək mümkündür. Avtomobilin sükanı arxasına keçdikdən az sonra ona tam uyğunlaşır və onu rahatca idarə edirsən. İki nəfər üçün nəzərdə tutulan və hündür mərkəzi tunellə ayrılan arxa oturacaqlarda üçüncü sərnişinin yerləşməsi mümkün deyil. Maili dam örtüyü ucaboy sərnişinləri bir qədər əyilməyə vadar edə bilər. Amma ayaqlar üçün yer kifayət qədərdir.

Mühərrik S-Tronic sürət qutusunun rıçaqının yanındakı alüminium düymə vasitəsilə işə salınır. Bu mühərrik turbinlə və birbaşa yanacaqçiləmə sistemi ilə təchiz olunub, 2,0 litr həcmli və 211 at güclüdür. Robotlaşdırılmış sürət qutusunda iki bəndləyici var (Q5 modelində olduğu kimi). Mühərrikin işə salınmasında heç bir problem yaranmır. O, sakit və rahat işləyir. Audi A5 Sportback-in yerindən tərpənməsi də rahat şəkildə baş verir. Gur avtomobil axınında rahatca hərəkət etmək olar. Sürət qutusunda sürət pillələrini dəyişərkən çox zəif təkan duyulur. Yaxşı olar ki, S-Tronic transmissiyasını "Sport" vəziyyətinə keçirəsiniz və bundan sonra sürət pillələrini əllə dəyişməyi birdəfəlik unudasınız. İnanın ki, robotlaşdırılmış sürət qutusu bunu daha yaxşı edir. Startda azacıq sakitlikdən sonra A5 Sportback iti sürət yığmağa başlayır. Qeyd edək ki, bu avtomobil tam ötürücülüdür, məşhur Torsen differensialı ilə təchiz olunub.

Audi avtomobillərinin idarəetmə sistemi üçün səciyyəsi ondan ibarətdir ki, bu şirkətin hər hansı modelini alan sürücü yüz faiz əminliklə bilir ki, avtomobil praktiki olaraq bütün vəziyyətlərdə özünün etibarlılığını təsdiqləyəcək və sürücünün təcrübəsizliyi ucbatından və ya hər hansı digər səbəbdən səhv etməsinə yol verməyəcək. Adi hərəkət rejimlərində və hətta gərgin rejimlərdə asfalt yolda o, sakitcə öz işini yerinə yetirir. Hətta iti sürətlə dönmə əməliyyatlarında da sürücü özünü vəziyyətin tam sahibi kimi hiss edir.

Stabilləşdirmə sistemi işə salındıqda belə, sürətli dönmə zamanı A5 Sportback-in "quyruq" hissəsi bir qədər ləngər vurur. Amma bu, çox yumşaq şəkildə baş verir. Asqının sərtliyi elə tənzimlənib ki, yolda bəzi xırda maneələrin sərt şəkildə dəf edilməsini təbii qarşılamaq lazımdır.

Bütün bunlar dönmə əməliyyatları zamanı sürücünün A5 Sportback-dən aldığı zövqün müqabilində əhəmiyyətsiz şeylərdir. A5 Sportback-in sahibi özünü, həqiqətən, sanballı avtomobilin sahibi hesab edə və çəkinmədən bu avtomobildə işgüzar danışıqlara yollana bilər.

Əminəm ki, A5 Sportback-in sahibi müəyyən incəliklərə bələd olan, müəyyən incə üslubla seçilən adam olmalıdır. Məncə, bu avtomobil hamı üçün deyil. Hərçənd ki, Audi modelləri arasında onu istənilən şəxs əldə edə bilər. Amma A5 Sportback-in incəliklərini anlamaq hər adam üçün əlçatan deyil.

Bu avtomobili aldıqdan sonra ilk vaxtlar seçiminin doğruluğu ilə bağlı tərəddüd içində olan alıcı onu idarə etdikcə seçimində yanılmadığına əmin olacaq. A5 Sportback, sözün əsl mənasında, "öz" alıcısı üçün yaradılmış avtomobildir.

Audi A5 Sportback və digər Audi modelləri ilə alman avtomobil istehsalçısının Azərbaycandakı yeni təmsilçisi Europenan Cars şirkətinin Babək pr., 43A ünvanında yerləşən Audi Bakı Mərkəzində tanış ola bilərsiniz.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.