Almaniyada yol hərəkəti qaydalarını ləğv etməyi planlaşdırırlar

Просмотров: 2321
Almaniyada yol hərəkəti qaydalarını ləğv etməyi planlaşdırırlar

Əgər Aşağı Saksoniyanın kiçik Bomte şəhərinin hakimiyyət orqanlarının iki il öncə başladığı qeyri-adi sosial eksperiment alınsa, yol hərəkəti qaydalarının ləğvi yerli səviyyədə həqiqətən baş verə bilər. Eksperiment çərçivəsində yerli administrasiya hamının vərdiş etdiyi yol hərəkəti qaydalarını sürücü və piyadalara xatırladan hər bir şeyi yollardan yığışdırmaq barədə göstəriş vermişdi.

Şəhərdə artıq iki ildir ki, nə bir yol nişanı və işıqfor, nə də yolun səki ilə ayrılan hərəkət hissəsi var. Bunların əvəzinə yolda hamını ümumi məkanı paylaşmağa çağıran bircə nişan var. İlk baxışdan xaosa gətirib çıxarmalı olan bu hal əslində tamamilə əks effekt verib: indi sürücülər yolda daha diqqətli, səliqəli və nəzakətlidirlər, hava isə daha təmizdir.

Meriya nümayəndəsinin sözlərinə görə, yollarında hər gün 13.500 avtomobilin hərəkət etdiyi yaşayış məntəqəsində sürücü və piyadalara bərabər hüquqlar veriləcək. “Avtomobil sahibləri daha üstünlüyə malik olmayacaqlar”, – deyə o, bildirib. 

Bomtedə səkilərin səviyyəsi yolun hərəkət hissəsi ilə bir səviyyəyə endirilib, yol kənarlarındakı bordyurlar sökülərək ləğv edilib. Yol hərəkətinin bütün iştirakçılarının əməl etməli olduqları yeganə qayda belədir: “maneə sağ tərəfdədir”.

Niderlandın Haren və Emmen icmalarından və Frislan əyalətindən, Belçikanın Ostende və Danimarkanın Eybi yaşayış məntəqələrindən və İngiltərənin İpsviç şəhərindən sonra kiçik alman şəhəri Bomte Qərbi Avropanın yeddinci yaşayış məntəqəsidir ki, Avropa İttifaqı tərəfindən maliyyələşdirilən “Shared Space” adlı layihədə iştirak edir (bu şəhərdə eksperiment 2007-ci ilin sentyabrında start götürüb). Layihənin müəllifi nəqliyyat yollarının planlaşdırılması sahəsində çalışan hollandiyalı mütəxəssis Hans Mondermandır.

Avropa İttifaqı Bomtedə işıqforların demontajına 1,6 milyon dollar xərcləyib. Layihə artıq uğurlu tədbir kimi özünü doğruldub. Layihənin tətbiq edildiyi yaşayış məntəqələrində qəza hallarının sayı aşağı düşüb.

Layihə müəllifinin qeyd etdiyinə görə, yol nişanları olmadıqda insanlar əvvəlcə nə edəcəklərini bilmirlər. Bu halda onlar ətraf aləmlə vizual kontakt axtarmağa başlayırlar. Yolda hərəkət nə qədər təhlükəlidirsə, yol hərəkətinin iştirakçıları bir o qədər diqqətli olurlar ki, bunun da nəticəsində yol hərəkəti həm onların özləri üçün, həm də ətrafdakılar üçün təhlükəsiz olur.

“Bu, insan psixikası nöqteyi-nəzərindən məntiqə zidd görünür, amma təcrübədə özünü ən yaxşı şəkildə doğruldur. Hüquqları bərabərləşdirilən sürücülər və piyadalar insanların ümumi birgəyaşayış prinsiplərinə uyğun olaraq vahid məkanda hərəkət etmək məcburiyyətindədirlər”, – deyə Mondermann bildirib.  

Əgər layihə gələcəkdə də bu cür müsbət nəticələr versə, onun Berlin və Bremen kimi iri şəhərlərin küçələrində sınaqdan keçirilməsi istisna olunmur.



Hazırladı: Sevinc Yusifova


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.