Ah, bu uşaqlar!

Просмотров: 1812
Ah, bu uşaqlar!

Böyüklər uşaqların pis vərdişlərə daha tez öyrəşdiklərindən həmişə şikayət edir. Amma balacalar çox vaxt mənfi davranışları elə onların özündən öyrənirlər. Böyüklərin diqqətindən yayınmağı bacaran balacalar gizlicə təkcə atalarının papirosunu oğurlamaqla kifayətlənməyib, hətta onların avtomobillərini də qaçıra bilirlər.

Artıq bu tip hadisələr bir neçə dəfə müxtəlif ölkələrdə valideynlərin başına gəlib. Bu yaxınlarda Amerikanın Ohayo ştatında gecə evində şirin-şirin yatan valideynlərin də heç ağlına gəlməzdi ki, gecənin bir yarısı onları polislərin zəngi oyadacaq.

Onların 5 yaşlı oğlu Cey Parsons nənəsinin avtomobilinin açarını gizlicə götürüb və onu qaçırıb. 5 yaşlı dələduz avtomobil ilə 1 km-dən çox məsafə də qət edib,  amma onun yoluna çıxan Ford Tauras markalı avtomobilin sürücüsü uşağın “Ginnessin rekordlar kitabı”na girməyinə maneçilik törədib.

Hadisə, bəlkə də, çox gülməli olardı, əgər ki, uşaq aldığı zədədən dünyasını dəyişməsəydi. Belə ki, avtomobillərin toqquşması və sonra da Ceyin “idarə etdiyi” avtomobilin böyük ağaca çırpılması onun ağır yaralanmasına səbəb olur.

Nəticədə balaca Cey  həlak olur.  Ceyin valideynləri daha sonra belə bədbəxt hadisənin tək onların başına gəlmədiyini öyrənirlər.

Ərəb əmirliklərində yaşayan və Ceyin həmyaşıdı olan bir oğlan da atasının kirayə götürdüyü avtomobilin açarlarını götürüb onu 3 km məsafədə sürə bilib.

Bu balaca bir neçə dəfə qəza vəziyyəti yaradaraq, 4 avtomobilin zədələnməsinə səbəb olub. Xoşbəxtlikdən özünü oğluna çatdıra bilən ata onu mühərriki söndürmək üçün yola gətirə bilib.

Böyük Britaniyada yaşayan 3 yaşlı oğlancığaz isə 9 min funt (17 min dollar) dəyərində avtomobil alıb. Özü də avtomobilə internet vasitəsi ilə keçirilən auksionda sahib olub. Atasının kompüterin arxasından qalxdığını görən azyaşlı düyməni basmaqla retro model olan Nissan Fiqaro-nu aldığını təsdiq edib.

3 yaşlı Cek Nilin atası alış-veriş haqqında məktubu alanda gözlərinə inanmır. Daha sonra məsələnin nə yerdə olduğunu öyrənən ata xeyli gülür.

Amma balaca Cekin əziyyəti hədər gedir. O ancaq böyüdüyündə avtomobil almağın daha doğru olduğunu sonralar anlayacaq. Bununla belə, Cek tarixə ilk azyaşlı internet müştərisi kimi düşməyi də bacardı.

Amerikalı Edrian Koul isə Cekdən daha düşüncəlidir. Gecənin qaranlığında valideynlərini yuxudan oyatmağa qıymayan 4 yaşlı Edrian oyun oynamaq həvəsini yatıra bilmir. Yeni videooyun eşqinə düşən balaca evlərindən 400 metr məsafədə yerləşən mağazaya anasının avtomobili ilə getməyi qərara alır.  Ancaq “düşüncəli” Edrian avtomobilin böyüklər üçün yaradıldığını düşünmür.
Sürücü oturacağına əyləşən oğlan ayağının pedala çatmadığını görür, buna görə də o, bir az aşağı sürüşür. Yolu görə bilməyən “balaca oğru” bu dəfə ayağını pedaldan çəkib yuxarı boylanır.

Beləcə, o, mağazaya heç bir qəza törətmədən çata bilir. Ancaq gecəyarı olduğundan ora artıq bağlı olur. Kor-peşman yenidən sükan arxasına keçən 4 yaşlı sürücünü bir neçə dəqiqədən sonra polis saxlayır.

Polisin saatda 10-15 km sürətlə gedən avtomobili saxlamasına səbəb sürücünün onu yol boyu ziq-zaq formada sürməsi olur. Hadisəni daha sonra valideynlərlə birgə idarədə araşdıran polis onların vəziyyətini anlayıb cəza kəsmir.       


Kilsəyə getmək istəməyən Amerikanın Yuta ştatının 7 yaşlı vətəndaşı da valideynlərinin binaya daxil olmağından istifadə edib atasının avtomobilinə oturub oradan uzaqlaşır. Ailə üzvlərinin onu saxlaması mümkün olmur.


Valideynlərin müraciəti ilə hərəkətə keçən polisə balaca dələduzu saxlamaq elə də asan başa gəlmir. Bütün yol-hərəkət qaydalarını pozan qanunsuz sürücü avtomobili saatda 70 km sürət ilə sürüb. Yaşının az olması ona avtomobil sürməyi qadağan etsə də, cəza almaqdan da yaxasını qurtarıb.

Bu gün belə hadisələr ölkəmizdə xoşbəxtlikdən baş vermir. Ancaq tez-tez 5-10 yaş arası olmasa da, 15-16 yaşlı məktəblilərin avtomobil idarə etməsinin, həmçinin ataların sükan arxasında avtomobil idarə edərkən azyaşlı uşaqlarını qucaqlarında oturtmasının da şahidi oluruq.

Bu da pisi yaxşıdan ayırmağı bacarmayan, qanunun ancaq valideynin “olmaz” sözündən ibarət olduğunu düşünən uşaqların xoşagəlməz hadisələr yaratmağına səbəb ola bilər.

Bunun üçün isə biz uşaqlarımızı cəzalandırmalı deyil, onları başa düşəcəkləri tərzdə tərbiyələndirməliyik. Hər şeyi vaxtından tez etməyi istəyən uşaqları başa düşək, axı bir vaxtlar biz də uşaq olmuşuq.       


Sevinc Yusifova



© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.