21-ci əsrin Beetle-ı

Просмотров: 2267
21-ci əsrin Beetle-ı
  • 21-ci əsrin Beetle-ı
  • 21-ci əsrin Beetle-ı
  • 21-ci əsrin Beetle-ı
  • 21-ci əsrin Beetle-ı
  • 21-ci əsrin Beetle-ı
  • 21-ci əsrin Beetle-ı

Nəhayət, şayiələrə, ehtimallara, yanlış mülahizələrə son qoyuldu. Əfsanəvi Beetle avtomobilinin üçüncü nəsli işıq üzü gördü. İlk dəfə Volfsburq (Almaniya) konserninin Beetle adlı hetçbeki uzaq 1938-ci ildə işıq üzü görmüşdü. Daha sonra 1998-ci ildə bu avtomobilin New Beetle adlı ikinci nəsli peyda oldu. Üçüncü nəslin işıq üzü görməsini gözləmək üçün 60 il deyil, cəmi 13 il kifayət etdi. Şanxay motor-şousunda yeni üçqapılı Volkswagen Beetle debüt etdi.

Volkswagen konserninin marketinq üzrə direktoru Luka de Meonun sözlərinə görə, avtomobildə “kuzov, mühərrik, baqaj bölməsi, salon – hər şey təzələnib”. O, yeni hetçbekin qarşısında duran üç vəzifəni belə ifadə etdi: İlkin (orijinal) Beetle avtomobilinin ruhunu qaytarmaq, yəni onu alıcılar üçün daha əlçatan, davamlı və istifadə üçün sadə etmək,  avtomobillə sürücünün emosional əlaqələrini bərpa etmək və avtomobilin ilkin formalarını 21-ci əsrə gətirmək.

Volkswagen konserninin baş dizayneri Klaus Bişoffun sözlərinə görə, bütün bu məqsədlərə nail olmaq üçün onlar hazırkı Beetle avtomobilini bir kənara qoyaraq studiyada ilkin Beetle versiyası üzərində iş aparıblar. 2012-ci ilin avtomobili əvvəlki versiyadan 150 mm uzun, 3,2 düym enlidir, eyni oxdakı təkərlər arasında məsafə də daha böyükdür. Həmçinin onun kapotu əvvəlki versiyadan daha böyükdür, qabaq şüşəsi daha vertikal yerləşir və sürücüyə daha yaxındır. Hələ yanvar ayında fotoşəkli çəkilmiş avtomobillə müqayisədə Şanxayda nümayiş etdirilmiş hazır məhsul bir qədər fərqli görünür.

Rəsmi fotoşəkillər belə bir ilkin məlumatı təsdiq edir ki, Beetle avtomobilinin üçüncü nəslinin hazırlanmasında altı il əvvəlki Ragster konseptindən çox şey götürülüb. Təbii ki, müasir Volfswagen Beetle hetçbeki işıq-diodlu yeni qabaq faralarla təchiz olunub.

Cihazlar panelində kuzovun rəngində rənglənmiş elementlər və sükan çarxı, habelə xarici işıqlandırma (bu işıqlar qırmızı rəngdən ağ və ya göy rəngə qədər dəyişə bilər) diqqəti cəlb edir.

Avtomobilə quraşdırılacaq mühərriklər müxtəlif ölkələrdə fərqlidir. Məsələn, 170 at gücünə malik 2,5 litr həcmli beş silindrli benzin mühərrikini yalnız ABŞ-da sifariş etmək mümkün olacaq. O, beşpilləli mexaniki transmissiya və ya avtomat transmissiya ilə tandemdə işləyəcək. Avropa üçün almanlar avtomobilin dizel mühərrikli variantını hazırlayıblar. Bu mühərrik 140 at güclü, 2,0 litr həcmli olacaq. 200 at gücünə malik 2,0 litr həcmli benzin turbomotoru quraşdırılmış avtomobili isə həm Avropanın, həm də Amerikanın avtomobil həvəskarları əldə edə biləcəklər. Bu güclü mühərrik mexaniki transmissiya və ya DSG “robotu” ilə tandemdə işləyəcək.

Volkswagen-nin təmsilçilərinin sözlərinə görə, əfsanəvi Beetle avtomobilinin yeni nəslini hazırlayarkən onlar retro üslubunu saxlamaqdan daha çox, hetçbekin texniki elementlərini yaxşılaşdırmağa çalışıblar. Belə ki, şirkət təmsilçilərinin sözlərinə görə, onlar avtomobilin idarəetməsini xeyli yaxşılaşdırmağa nail olublar. Üçüncü nəsil Beetle avtomobilində ön asqı McPherson dayaqları, arxa asqı isə torsion tirlə təchiz olunub. Ön ötürücülü transmissiya və asqının bəzi detalları Jetta modelindən götürülüb.

Tarixçə

Volkswagen Beetle (almanca Käfer) modelinin yaranmasının rəsmi tarixi 1946-cı il hesab olunur. Məhz həmin il İkinci Dünya müharibəsindən sonra bu modelin seriyalı istehsalına başlanıldı. Almaniya hökumətinin sifarişi əsasında bu modelin hazırlanması hələ xeyli əvvəl – 1934-cü ildə Porsche AG avtomobil kompaniyasının təsisçisi, məşhur alman konstruktoru Ferdinand Porşeyə həvalə olunmuşdu. Adolf Hitlerin göstərişinə əsasən, ucuz (dəyəri 1000 reyxsmarkayadək), davamlı və etibarlı “xalq avtomobili”ni layihələşdirmək tələb olunurdu. Porşenin rəhbərliyi altında 1935-ci ildə avtomobilin üç prototipi hazırlandı. Bu cür avtomobillərin 30 ədəddən ibarət ilk sınaq partiyası 1937-ci ildə Daimler-Benz zavodunda yığıldı və sonra ümumilikdə iki milyon kilometrə yaxın məsafə qət edərək sınaqdan çıxarıldı.

Beetle avtomobilinin birinci nəslinin yekun variantı 1938-ci ildə təsdiq olundu. Volfsburqda bu avtomobilin buraxılışı üçün inşa edilən zavodun təməl daşının qoyulması mərasimində Hitler onun adını səsləndirdi: “Kraft durx froyde” (Kdf). Amma rəsmi adı Kdf-38 olan, eləcə də Volkswagen-38 (1938-ci il buraxılışlı “xalq avtomobili”), yaxud Beetle (Beetle “böcək” deməkdir, zahirən böcəyə bənzədiyinə görə avtomobilə bu ad verildi) adlandırılan bu avtomobilin kütləvi istehsalı 1939-cu ildə başlamış Dünya müharibəsi ucbatından baş tutmadı. 

Müharibə zamanı almanlar konstruksiyası Beetle avtomobilinə maksimum yaxın olan hərbi Kübelwagen avtomobilini buraxdılar. Beetle avtomobilinin istehsalı Meksika, Nigeriya, Braziliya, Avstraliya və digər ölkələrdə təşkil olundu. Onun sonuncu modifikasiyasının buraxılışına 2003-cü ildə xitam verildi. Bu müddətdə cəmi 21.529.464 ədəd Beetle avtomobili və onun modifikasiyaları buraxıldı. 

Modelin New Beetle adlandırılan ikinci nəsli (üçqapılı hetçbek və ikiqapılı kabriolet) 1997-ci ildən 2010-cu ilədək buraxıldı. Üslub baxımından klassik Beetle ilə oxşar olan New Beetle avtomobili dördüncü nəsil Volkswagen Golf-un platformasında hazırlanmışdı.

Üçüncü nəsil Beetle avtomobilinin satışlarına Şimali Amerikada 2011-ci ilin payızında, Böyük Britaniyada isə 2012-ci ilin əvvəlində start veriləcək. Məlumatlara görə, yeni Beetle sentyabr və ya oktyabr ayında “olduqca rəqabət qabiliyyətli” qiymətlə satışda peyda olacaq.

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir. 

Şərhlərin sayı: 0

AVATAR
Hələ heç kim şərh verməyib. Birinci siz olun.